ނޫރާއާ ވަކިވާން ޖެހުމުން ލިބުނު ފުން ހިތާމައިގެ ތެރޭގައި ދުވަސްކޮޅަކު އަރާޝް އުޅުނެވެ. އޭނާގެ ދުނިޔެ އަނދިރިވެ ކުރާނެ ކަމެއް ދާނެ ދިމާލެއް ނޭނގުނެވެ. އޭނާގެ ހިތް ފުނޑުފުނޑުވެފައިވިއެވެ. ކޮންމެ ރެއަކުވެސް ނިދި ނައިސް ނޫރާގެ ހަނދާންތަކުގައި ގެއްލިފައި ހުރެއެވެ. އެކަމަކު އެއް ރެއަކު އޭނާ އަތިރިމަތީގައި އިނދެ ނޫރާއާއެކު ހޭދަކުރި ފުރަތަމަ ރޭގެ ހަނދާންތައް އާކުރަމުން ދިޔައިރު އޭނާގެ ހިތަށް އާ ހިތްވަރެއް ލިބުނެވެ. ނޫރާގެ ބައްޕަ އިސްމާޢީލް ބޭގެ އަވަމާން ކުރި ލަފުޒުތައް ހަނދާންވުމުން އޭނާގެ ހިތާމަ ވަރުގަދަ އަޒުމަކަށް ބަދަލުވިއެވެ. "އަހަރެން މާޔޫސްވެގެން ނުވާނެ. އަހަރެންގެ ގާބިލްކަން ދައްކާނަން. އަހަރެން ނޫރާގެ ބައްޕައަށް ދައްކާނަން އަގުހުރިކަމަކީ ހަމައެކަނި ފައިސާއިން މިންކުރެވޭ އެއްޗެއް ނޫންކަން. އަހަރެން ނޫރާ އަނބުރާ ހޯދާނަން! އަހަރެން މިކަން ކުރާނަން! ކޮންމެ ހުރަހެއް ކުރިމަތިވިޔަސް އަހަރެން ހުއްޓައެއް ނުލާނަން." އޭނާ އަމިއްލަ ނަފްސަށް ވަޢުދުވިއެވެ.
އެދުވަހުން ފެށިގެން އަރާޝްގެ ދިރިއުޅުން ބަދަލުވެގެން ދިޔައެވެ. އޭނާގެ ހުރިހާ ވަގުތަކާއި ހަކަތައެއް ހުސްކުރީ އޭނާގެ އަމިއްލަ ވިޔަފާރިއެއް ގޮޑަނެގުމަށެވެ. އޭނާގެ ހިތުގައި ހުންނެވި ނޫރާގެ ސޫރައަކީ އޭނާއަށް ހިތްވަރު ދޭ ބާރަކަށް ވިއެވެ. ރޭގަނޑުގެ ނިދި ދޫކޮށްލައިގެން ދުވާލުގެ ވަރުބަލިކަމަށް ބެލުމެއްނެތި އޭނާ މަސައްކަތް ކުރިއެވެ. އޭނާ ފެށީ ވަރަށް ކުޑަކުޑަކޮށެވެ. އޭނާގެ ހުރިހާ ސަލާމަތްތެރިކަމެއް ދޫކޮށްލާފައި ރިސްކުތަކެއް ނެގިއެވެ. އެތައް ދަތިތަކަކާއި ނާކާމިޔާބީތަކަކާ ކުރިމަތިލާން ޖެހުނެވެ. ބައެއް ފަހަރު އޭނާގެ ހިތްވަރު އެލުނު ނަމަވެސް ނޫރާގެ ހަނދާން އޭނާއަށް ހިތްވަރު ދިނެވެ. "ނޫރާއަށްޓަކައި... ނޫރާއަށްޓަކައި އަހަރެން މިކަން ކުރަން ޖެހޭނެ" އޭނާ އަމިއްލަ ނަފްސަށް ބުނެލައެވެ.
އޭނާގެ ކޮންމެ ކާމިޔާބީއަކީ ނޫރާއާ ގާތްވުމަށް އެޅޭ ފިޔަވަޅެއްކަމަށް އޭނާ ދެކުނެވެ. އޭނާގެ ކުޑަ ވިޔަފާރި މަޑުމަޑުން ކުރިއަރަން ފެށިއެވެ. އޭނާގެ ބުރަ މަސައްކަތާއި ކެތްތެރިކަމުގެ ސަބަބުން ކަސްޓަމަރުންގެ އިތުބާރު ލިބި ބޮޑެތި މަޝްރޫޢުތަކެއް ހޯދިއެވެ. މީގެ ކުރިން އޭނާއަށް ފުރަގަސް ދިން މީހުންނަށް އޭނާގެ ކާމިޔާބީ ފެނި ހައިރާންވިއެވެ. އެތައް އަހަރެއްގެ ބުރަ މަސައްކަތުން އަރާޝް ވަނީ ކާމިޔާބު ވިޔަފާރިވެރިއަކަށް ވެފައެވެ. އޭނާގެ ނަން މުޖުތަމަޢުގައި މަޝްހޫރުވެ ގިނަ ބަޔަކު އިޙްތިރާމްކުރާ ޒުވާނަކަށް ވެއްޖެއެވެ. އޭނާގެ ހިތުގައި އަބަދުވެސް އޮތީ ނޫރާއަށްޓަކައި އޮތް ލޯބިއެވެ. އެ ލޯބި އޭނާގެ ހިތުގައި އަޅިތަކުގެ ތެރެއިން އުފަންވި ފީނިކްސްއެއް ފަދައިން ބާރުގަދަ ވިއެވެ. އޭނާގެ ހިތުގައިވާ ހަމައެކަނި އުއްމީދަކީ އަލުން ނޫރާއާ ގުޅި އުފާވެރި ދިރިއުޅުމެއް ފެށުމެވެ.
6ބައި 6 / 10