މަލްޝާ އޭނާގެ މައިންބަފައިންނާ ދިމާއަށް ހަޅޭއްލެވި ރެއަށްފަހު ގޭތެރޭގެ މާޙައުލު އޮތީ ވަރަށް ބީރައްޓެހިވެފައެވެ. ފާއިޒް އާއި ޝާއިރާ ތިބީ ހިތާމައިން ފުރިފައެވެ. އެމީހުންގެ ލޯބިވާ ދަރިފުޅު އެމީހުންނާ އެހާ ދުރުވެ އެފަދަ ބަސްތައް ބުނާނެ ކަމަކަށް އެމީހުން ދުވަހަކުވެސް ހީކޮށްފައެއް ނުވެއެވެ. މަލްޝާ އުޅެމުން ދިޔައީ އޭނާގެ އަމިއްލަ ކުށުގެ އިޙްސާސުތަކުގެ ތެރޭގައި ޣަރަޤުވެގެންނެވެ.
ސްކޫލްގެ ތެރޭގައިވެސް ކަންތައްތައް ދިޔައީ ގޯސްވަމުންނެވެ. އޭނާގެ އެންމެ ގާތް އެކުވެރިޔާ އައިޝާ، މަލްޝާގެ މި ބަދަލުވުންތަކާމެދު ހުރީ ވަރަށް ބޮޑަށް ކަންބޮޑުވެފައެވެ. އޭނާ އެތައް ފަހަރަކު މަލްޝާއާ ވާހަކަ ދައްކަން މަސައްކަތް ކުރިއެވެ. ނަމަވެސް ކޮންމެ ފަހަރަކުވެސް މަލްޝާ އޭނާ ދެކެ ދުރުހެލިވެއެވެ.
އެއްދުވަހަކު ސްކޫލް ނިމިގެން ގެއަށް ދާން ދަނިކޮށް އައިޝާ މަލްޝާގެ މަގުމަތިން ދިމާކޮށް އޭނާ ހުއްޓުވިއެވެ.
"މަލްޝާ އަހަރެން ކައިރީ ބުނެބަލަ، ކިހިނެއްވެގެންތަ ތި އުޅެނީ؟" އައިޝާގެ އަޑުގައިވީ އާދޭހުގެ ރާގެކެވެ. "ކުރިން އުޅުނު މަލްޝާ ކޮބާ؟ އަހަރެމެންމީ އެކުވެރިންނެއްނު. ކޮންމެ ކަމެއްވިޔަސް ހިއްސާ ކުރެވިދާނެއެއްނު."
މަލްޝާއަށް އައިޝާގެ މޫނަށް ބަލާކަށް ނުކެރުނެވެ. އޭނާގެ ހިތުގެ އަޑިން ބޭނުންވީ އައިޝާގެ ކޮނޑުގައި ބޯ އަޅާލައިގެން ރޯށެވެ. ހުރިހާ ވާހަކައެއް ކިޔައިދޭށެވެ. ނަމަވެސް އެ ބްލެކްމެއިލަރުގެ ބިރު އޭނާގެ ހިތުގައި ވަކި ހިއްޕާލާފައިވާލެއް މާބޮޑެވެ.
"އެއްވެސް ކަމެއް ނުވޭ އައިޝާ" މަލްޝާ ރުންކުރު އަޑަކުން ބުންޏެވެ. "އަހަރެން ބޭނުމީ އެކަނި އުޅެން. އަހަންނާ ދުރަށްދޭ."
އެ ބަސްތަކުން އައިޝާގެ ހިތުގައި ޖެހުނެވެ. "އެކަނި އުޅެން މަލްޝާ އަހަރެމެންގެ އެކުވެރިކަމަކީ އެހާ ފަސޭހައިން ދޫކޮށްލެވޭނެ އެއްޗެއްތަ؟"
"އާނ!" މަލްޝާ ބާރަށް ބުނެލިއެވެ. "އަހަރެންގެ ފަހަތުން ނާންނާތި. އަހަރެން ބޭނުމެއް ނޫން ތިކަހަލަ ރައްޓެހިންނެއް."
މަލްޝާ އެހެން ބުނެފައި އަވަސް ފިޔަވަޅުތަކެއްގައި ކުރިއަށް ހިނގައިގަތީ އައިޝާގެ މޫނުމަތިން ފެނުނު ހިތާމައިގެ އަސަރުތަކަށް ބަލާނުލައެވެ. އޭނާގެ ހިތް ކުދިކުދިވަމުން ދިޔައަސް އޭނާ ގަބޫލުކުރި ގޮތުގައި އައިޝާއާއި އެހެން ރައްޓެހިން އޭނާއާ ދުރުކުރުމަކީ އެމީހުންނަށް ރައްކާތެރިކަން ހޯދައިދިނުމަށް އޭނާއަށް ކުރެވޭނެ ހަމައެކަނި ކަންތަކެވެ.
އެ ދުވަހު އޭނާ ގެއަށް ދިޔައީ ހަމައެކަނި މައިންބަފައިންނާ ދުރުވެގެންނެއް ނޫނެވެ. އޭނާގެ އެންމެ ގާތް އެކުވެރިޔާވެސް އޭނާގެ އަމިއްލަ އަތުން ދުރުކުރުމަށްފަހުއެވެ. މަލްޝާ މުޅިން އެކަނިވެއްޖެއެވެ. އޭނާގެ ވަށައިގެންވާ ދުނިޔެ މަޑުމަޑުން އަނދިރިވަމުން ދިޔައެވެ.
7ބައި 7 / 10