އޭނަ ދިޔުމަށްފަހު ލައިބްރަރީއަކީ ހުސް ތަނަކަށް ވެއްޖެއެވެ. އެތައް ސަތޭކަ ދަރިވަރުން އެތަނުގައި އުޅުނަސް ޒޯޔާއަށް އިޙްސާސް ކުރެވެނީ އެކަނިވެރިކަމެވެ. އޭނަ އިށީނދެއުޅުނު މޭޒު ދޮށުގައި މިހާރު އިށީންދެގެންއިނީ އެހެން ކުއްޖެކެވެ. އެކަމަކު ޒޯޔާގެ ލޮލަށް އަދިވެސް ފެންނަނީ އެތަނުގައި އޭނަ އިންނަ މަންޒަރެވެ. ފޮތަކަށް ގެއްލިފައި ނުވަތަ ފުން ޚިޔާލެއްގެ ތެރޭގައި އިނދެގެން އިސްތަށިގަނޑު ހާވާލާ މަންޒަރެވެ.
އިމްތިޙާންތައް ނިމި ޔުނިވާސިޓީގެ ދިރިއުޅުން މަޑުޖެހިލުމުން ޒޯޔާއަށް ވިސްނުނީ އޭނަގެ ދުވަސްތަކުގެ ކިހާ ބޮޑު ބައެއް އޭނައަށްޓަކައި ހުސްކޮށްފައި އޮތްކަމެވެ. ހެނދުނު ތެދުވާއިރުވެސް ހިތަށް އަރަނީ "މިއަދު އޭނަ ލައިބްރަރީއަށް އަންނާނެބާ؟" މިހެންނެވެ. އެ އުއްމީދު މިހާރަކު ނެތެވެ.
ޒޯޔާގެ ހިތުގައިވާ ބަޔާންކުރަން ދަތި ހުސްކަން ފިލުވާލުމުގެ ބޭނުމުގައި އޭނަ މަސައްކަތް ފެށިއެވެ. އޭނަގެ ނަމަކީ ކޮބައިތޯއެވެ. އޭނަ އުޅެނީ ކޮންތާކުތޯއެވެ. ޒޯޔާ ފޯނު ނަގައިގެން ޔުނިވާސިޓީގެ އާކިޓެކްޗަރ ޑިޕާޓްމަންޓްގެ ސޯޝަލް މީޑިއާ ޕޭޖްތައް ބަލަން ފެށިއެވެ. ގްރެޖުއޭޓްވި ދަރިވަރުންގެ ފޮޓޯތަކުގެ ތެރެއިން އޭނަގެ މޫނު ހޯދުމަށެވެ. އެތައް ސަތޭކަ މޫނުތަކެއްގެ ތެރެއިން ޒޯޔާ އެންމެ މޫނެއް ހޯދަމުން ދިޔައެވެ.
އެތައް އިރަކު ހޭދަކުރުމަށްފަހު އެންމެ ފަހުން ޒޯޔާއަށް އޭނަ ފެނުނެވެ. ގްރޫޕް ފޮޓޯއެއްގެ ތެރެއިންނެވެ. އޭނަ ހުރީ އެހެން ކުދިންތަކަކާ އެކު ހިނިތުންވެލައިގެންނެވެ. ފޮޓޯގެ ދަށުގައި އެންމެންގެ ނަންތައް ލިޔެފައި ހުއްޓެވެ. ޒޯޔާގެ ހިތް ބާރަށް ތެޅެމުން ދިޔައެވެ. އިނގިލިތައް ތުރުތުރު އަޅަމުން އެ ނަންތަކާ އޭނަގެ މޫނާ ދިމާކުރަމުން ދިޔައެވެ.
އާދިލް!
އޭނަގެ ނަމަކީ އާދިލްއެވެ.
އެ ނަން އެނގުމުން ޒޯޔާގެ ހިތަށް ލިބުނީ އުފަލެއް ނޫނެވެ. އެއަށްވުރެ ބޮޑަށް ލިބުނީ ބީރައްޓެހި އިޙްސާސެކެވެ. އެތައް ދުވަހެއް ވަންދެން ޒޯޔާގެ ޚިޔާލީ ދުނިޔޭގައި އުޅުނު "އޭނަ" އަށް މިހާރު ނަމެއް ދެވި ހަޤީޤީ މީހަކަށް ވެއްޖެއެވެ. އޭނަގެ އަމިއްލަ ދިރިއުޅުމެއް ރައްޓެހިންތަކެއް އަދި އާއިލާއެއް ވާނެއެވެ. އެ ދިރިއުޅުމުގައި ޒޯޔާގެ އެއްވެސް ދައުރެއް ނެތެވެ.
އެ ނަން އެނގުމުން ޒޯޔާއަށް އިޙްސާސްވީ އޭނަ އާއި އާދިލް އާ ދެމެދު އޮތް ދުރުމިން އިތުރުވިހެންނެވެ. ކުރިން އޭނައަކީ ޒޯޔާގެ ހިތުގައި އޮތް ހުވަފެނެކެވެ. އެކަމަކު އާދިލް އަކީ ޒޯޔާއަށް އެނގުމެއް ނެތި އޭނަގެ އަމިއްލަ ހަޤީޤީ ދުނިޔޭގައި އުޅެމުންދާ މީހެކެވެ.
ޒޯޔާ ފޯނު ބޭއްވިއެވެ. އާދިލްގެ ނަން އެނގުނަސް އެއީ ހަމައެކަނި ބޭކާރު މަޢުލޫމާތެކެވެ. އެއީ ޒޯޔާގެ ނުފެށި ނިމިފައިވާ ވާހަކައިގެ ބޭކާރު ފޫޓްނޯޓެކެވެ.
4ބައި 4 / 6