އިހުމާންއާއި މަލަކްގެ ގުޅުން ބަދަހިވަމުން ދިޔައީ ދެމީހުންގެ 'މަޖާ' މިޒާޖުގެ ސަބަބުންނެވެ. އެކުގައި ދަތުރުތައް ގޮސް އަގުބޮޑު ޕާޓީތަކުގައި ބައިވެރިވެ ދިރިއުޅުމަކީ ހަމައެކަނި އުފާކުރުން ކަމަށް ދެމީހުންވެސް ދެކުނެވެ. އިހުމާން އޭނާގެ މުއްސަނދިކަން ބޭނުންކޮށްގެން މަލަކްއަށް ދުވަހަކުވެސް ނުލިބޭ ފަދަ ތަޖުރިބާތައް ހޯދައިދިނެވެ. މަލަކްއަށް ހީވަމުން ދިޔައީ އިހުމާންއަކީ އޭނާގެ ހުވަފެންތަކުގެ ރާޖާކަމަށެވެ.
އެކުގައި އުޅުނު ދުވަސްތަކުގައި އިހުމާން މަލަކްއަށް އޭނާގެ ދިރިއުޅުމުގެ ލަގްޒަރީއަށް ހޭނުވިއެވެ. އޭނާ މަލަކްއަށް އެހާވަރަށް އަޅާލައި އޭނާ ބޭނުންވި ކޮންމެ އެއްޗެއް ހޯދައިދިނެވެ. މަލަކްގެ ހިތް އެއްކޮށް އިހުމާންގެ އަތްދަށަށް ދިޔައީ ވަރަށް ފަސޭހައިންނެވެ. އޭނާ އިހުމާންދެކެ ހިތުގެ އެންމެ ފުންމިނުން ލޯބިވިއެވެ.
އެއްރެއަކު ރާޅުޖަހާ ހިތްގައިމު މަންޒަރެއް ފެންނަ ރިސޯޓެއްގެ ބީޗުގައި ތިބެ އިހުމާން މަލަކްގެ އަތުގައި ހިފައިލިއެވެ. "މަލަކް... އަހަރެންގެ ދިރިއުޅުން މިހާ ފުރިހަމަވީ މަލަކް އައުމުން. އަހަރެން ބޭނުން މަލަކްއާއެކު އަބަދަށް އުޅެން. އަހަރެން ދުވަހަކުވެސް ދޫކޮށެއް ނުލާނަން." މިފަހަރުވެސް އިހުމާންގެ ދޫމަތިން ބޭރުވީ ހިތާ ދެކޮޅު ފޮނި ބަސްތަކެކެވެ. މަލަކްގެ ދެލޯ އުފަލުން ފުރިގެން ދިޔައެވެ.
ނަމަވެސް އިހުމާންގެ ހިތުގައި އޮތީ މުޅިން އެހެން ރޭވުމެކެވެ. މަލަކްގެ މަޖާ މިޒާޖާއި ފަސޭހައިން އޭނާގެ ދަލުގައި ޖެހުނު ގޮތުން އިހުމާން ވަރަށް އަވަހަށް ފޫހިވިއެވެ. އޭނާއަށް މަލަކްއަކީ ދެން އެއްވެސް ގޮންޖެހުމެއް ނެތް ކުޅެ ނިމިފައިވާ ކުޅޭ އެއްޗަކަށް ވެއްޖެއެވެ.
އާދައިގެ މަތިން އިހުމާންގެ ފޯނުކޯލްތަކަށް ޖަވާބު ދިނުން މަދުވެ ބައްދަލުކުރުމަށް ދެކޮޅު ހަދަން ފެށިއެވެ. މަލަކްއަށް މިކަން ޤަބޫލުކުރަން ދަތިވިއެވެ. އެއްދުވަހަކު މަލަކް ވަރަށް ގިނައިރު އިންތިޒާރު ކޮށްފައި އިހުމާންއަށް ގުޅިއެވެ. "އިހުމާން ކިހިނެއްވީ؟ ކީއްވެ އަހަންނާ ދުރުވަނީ؟"
އިހުމާންގެ ޖަވާބު އައީ ގަދަފަދަ ހިތެއްނެތް ރާގަކަށެވެ. "މަލަކް އަހަރެމެންގެ ދެމެދުގަ އޮތް ކަންތައް ނިމުނީ. އަހަރެން ފޫހިވެއްޖެ. ދެން އަހަންނަށް ނުގުޅާތި!" އެހެން ބުނެ އިހުމާން ފޯނު ކަނޑާލިއެވެ. މަލަކްގެ އުފާވެރި ދުނިޔެ ސިކުންތު ކޮޅެއްގެ ތެރޭގައި އަނދިރިވެ އޭނާގެ ހިތް ކުދިކުދިވެގެން ދިޔައެވެ. އޭނާގެ ހިނިތުންވުންތައް ބަދަލުވެ އޭނާގެ ދިރިއުޅުން ހުއްޓުމަކަށް އައެވެ. އިހުމާން އާދައިގެ މަތިން އިތުރު ހިތެއް ހަލާކުކޮށްލުމަށްފަހު އާ ޝިކާރައަކަށް ތައްޔާރުވަމުން ދިޔައެވެ.
5ބައި 5 / 14