އިހުމާންގެ އަތްތުރުތުރުލަމުން ދިޔައިރު އޭނާ ސިޓީގައިވާ އަކުރުތަކަށް ބަލަހައްޓައިގެން ހުއްޓެވެ. އޭނާގެ ސިކުނޑިއަށް އެ ލިޔެފައިވާ އެއްޗެއް ޤަބޫލުކުރަން ދަތިވިއެވެ. އެއީ ނާއިލާގެ އަތުލިޔުމެވެ. ނަމަވެސް އެ ބަސްތަކުގައިވަނީ އޭނާ ދުވަހަކުވެސް އިޙްސާސްކޮށްފައިނުވާ ނަފުރަތެވެ.
"އިހުމާންއަށް
މި ސިޓީ ކިޔާއިރު އަހަރެން ހުންނާނީ ވަރަށް ދުރުގައި. ހައިރާންވާނެކަން އެނގޭ. އެކަމަކު ހަޤީޤަތަކީ މިއީ. އަހަރެންގެ ނަމަކީ ނާއިލާ. އިހުމާންގެ ފުރަތަމަ ޝިކާރަ، އަމީރާގެ ދައްތަ. އިހުމާން އަހަރެންގެ ކޮއްކޮގެ ދިރިއުޅުން ހަލާކުކޮށްލި ދުވަހު އަހަރެން އަޒުމް ކަނޑައެޅިން އިހުމާންއަށް އެ ވޭން އިޙްސާސްކޮށްދޭން.
އިހުމާން ދެކެ އަހަރެން ދުވަހަކުވެސް ލޯތްބެއް ނުވަން. އެއީ ހުރިހާވެސް ކުޅިވަރެއް. އިހުމާން އެހެން އަންހެން ކުދިންގެ ހިތްތަކާ ކުޅުނު ކުޅިވަރު. މިހާރު އިހުމާންގެ ހުރިހާ މުދަލަކާއި ވިޔަފާރިއެއް މިވަނީ އަހަރެންގެ ނަމުގައި. ތި އެޕާޓްމަންޓުންވެސް މިހާރުން މިހާރަށް ނިކުންނަން ޖެހޭނެ. ތީ ހަމަ އެކަނި ފެށުމެއް. އަހަރެންގެ ކޮއްކޮއަށް ލިބުނު ވޭނުގެ ކުޑަ މިންވަރެއް އިހުމާންއަށްވެސް މިހާރު އިޙްސާސް ކުރެވޭނެކަމަށް ހީކުރަން.
މިއީ އިހުމާންގެ ޢަމަލުތަކުގެ ނަތީޖާ.
- ނާއިލާ"
ސިޓީކޮޅު ކިޔައި ނިމުމާއެކު އިހުމާންގެ އަތުން އެ ކަރުދާސްކޮޅު ދޫވެގެން ވެއްޓުނެވެ. އޭނާގެ ހިތް ހުއްޓުނު ކަހަލައެވެ. އޭނާ ލޯބިވި ނާއިލާއަކީ އޭނާގެ ދުޝްމަނެކެވެ. އޭނާގެ މުޅި ދިރިއުޅުން އޭނާގެ އަތުން ފޭރިގަތީއެވެ. އޭނާގެ ލޯބި، އޭނާގެ ހިތް، އޭނާގެ މުދާ... ހުރިހާ އެއްޗެއް އޭނާއަށް ގެއްލުނީއެވެ.
އިހުމާން ކަކޫޖަހައިގެން ހަލާކުވެފައިވާ ހިތަކާއެކު ގަނޑުވިއެވެ. ފުރަތަމަ ފަހަރަށް އޭނާގެ ދިރިއުޅުމުގައި އޭނާގެ ލޮލުން ކަރުނަ އައެވެ. އެއީ ނާއިލާ އޭނާއަށް ދިން އޮޅުވާލުމުގެ ވޭނެވެ. އަދި އެއާއެކު އޭނާގެ މާޒީގައި އޭނާ ހަލާކުކޮށްލި ހިތްތަކުގެ ވޭން އޭނާއަށް އިޙްސާސް ކުރެވެން ފެށިއެވެ. އަމީރާ، ޒައިނަބު އަދި މަލަކްގެ ހިތްތަކަށް ކިހާވަރެއްގެ އަނިޔާއެއް ލިބިގެން ދިޔަވާނެކަން އޭނާއަށް އިހުސާސް ކުރެވެން ފެށިއެވެ.
އޭނާގެ ފޯނަށް ބެލިއިރު ބޭންކުން މެސެޖްތައް އައިސްފައި ހުއްޓެވެ. އޭނާގެ ހުރިހާ އެކައުންޓެއް ހުސްވެފައިވާކަން އަންގާފައެވެ. އޭނާގެ ކްރެޑިޓް ކާޑުތައް ބްލޮކްވެފައެވެ. އޭނާ މިހާރު އެއްވެސް އެއްޗެއް ނެތް ފަޤީރެކެވެ. މުއްސަނދިކަމާއި ބާރުގެ ގޮނޑިން އޭނާ މަގުމައްޗަށް އެއްލާލެވުނީއެވެ.
10ބައި 10 / 14