އާލިމްއަށް އެތާކު އިތުރަށް ހުރެވޭ ގޮތެއް ނުވިއެވެ. އޭނާގެ ހިތް ފަޅައިގެންދާން ކައިރިވެއްޖެއެވެ. އޭނާ އަވަސް ފިޔަވަޅުތަކެއްގައި އެ ގޯޅިގަނޑުން ނިކުމެގެން ގެއާ ދިމާލަށް ދުއްވައިގަތެވެ. އޭނާގެ ސިކުނޑީގައި ހަރުލާފައި ހުރީ ނަސީމްގެ ބައްޕަގެ އަނިޔާވެރި މޫނާއި ބިރުން ގޮތް ހުސްވެފައި ހުރި ނަސީމްގެ މަންޒަރެވެ.
ގެއަށް އާދެވުނުއިރުވެސް އާލިމްއަށް ހަމައަކަށް ނޭޅެވެއެވެ. އޭނާ ކޮޓަރިއަށް ވަދެ އެނދުގައި އިށީނދެ ދެއަތުން ބޮލުގައި ހިފަހައްޓާލިއެވެ. އޭނާ ކުރާނީ ކީންހެއްޔެވެ. މިކަން ރީމާއަށް ކިޔައިދޭނީ ހެއްޔެވެ. ނޫނީ ޓީޗަރަކަށް ރިޕޯޓް ކުރާނީ ހެއްޔެވެ. އެކަމަކު ނަސީމް މިކަން ސިއްރުކުރަނީ ކީއްވެ ހެއްޔެވެ. އޭނާ މިކަން އެހެން މީހަކަށް އެންގުމުން ނަސީމްއަށް އިތުރު ދެރައެއް ލިބިދާނެތީ އާލިމް ކަންބޮޑުވިއެވެ.
އެރޭ އާލިމްއަކަށް ނުނިދުނެވެ. އޭނާގެ ލޯމަތިން ފެންނަމުން ދިޔައީ ނަސީމްގެ ހިތާމަވެރި ހާލެވެ. ޖެހިގެން އައި ދުވަހު ސްކޫލަށް ގޮސް އާލިމްއަށް ނަސީމް ފެނުނުއިރު އޭނާ ހުރީ އެއްވެސް ކަމެއް ނުވާ ކަހަލަ ގޮތަކަށެވެ. އަނެއްކާވެސް އޭނާގެ މޫނުމަތީގައި ވަނީ އެ މަޖާ ހިނިތުންވުމެވެ. އޭނާ އެހެން ކުދިންނާ ސަކަރާތް ޖަހާ ހެމުން ދިޔައެވެ.
އާލިމްއަށް އެ މަންޒަރު ފެނިފައި ހިތަށް ވަރަށް އަސަރުކުރިއެވެ. މި ހިނިތުންވުމުގެ ފަހަތުގައި އޭނާ ފޮރުވަމުން އެގެންދަނީ ކިހާވަރެއްގެ ވޭނެއް ހެއްޔެވެ.
ބްރެކް ގަޑީގައި އާލިމް ނަސީމްއާއި އެކަނި ވާހަކަ ދައްކާލަން ފުރުސަތެއް ހޯދިއެވެ.
"ނަސީމް... އިއްޔެ ކިހިނެއްވީ؟" އާލިމް މަޑުމަޑުން އެހިއެވެ.
ނަސީމްގެ މޫނުމަތީގެ ކުލަވަރު ބަދަލުވެގެން ދިޔައެވެ. އެކަމަކު އޭނާ އަވަހަށް އެކަން ފޮރުވާލިއެވެ. "އިއްޔެ.. އިއްޔެ ކިހިނެއްވީ؟ ވަރަށް މަޖާވި. ގެއަށް ގޮސް ބަރަބޯރިހަ ކެވުނީމަ."
"އަހަރެން ދޮގެއް ނުހަދާނަން ނަސީމް. އަހަންނަށް އިއްޔެ ހުރިހާ ކަމެއް ފެނުނު." އާލިމް ސީރިއަސް ރާގަކަށް ބުންޏެވެ. "އަހަރެން ތިބާގެ ފަހަތުން ދިޔައިން."
އާލިމްގެ ޖުމްލަ ނިމުމާއެކު ނަސީމްގެ މޫނުމަތީގައިވި ހިނިތުންވުން މުޅިން ފިލައިގެން ދިޔައެވެ. އޭނާގެ ލޮލަށް ކަރުނަ ޖަމާވެ ދެރަވެފައިވާ މީހަކު ފަދައިން ބިންމައްޗަށް ބަލާލިއެވެ. އޭނާގެ އަނގައިން ބުނާނެ އެއްޗެއް ނޭނގިފައި އިނދެވުނު ކަހަލައެވެ. އޭނާގެ އަބަދުވެސް ހެވިފައި ހުންނަ މޫނު ފަހަރަށް ހަގީގީ ހިތާމައިން ފުރުނުތަން އާލިމްއަށް ފެނުނެވެ.
5ބައި 5 / 9