ކަނޑުއޮޅި ރަށުގެ ހިތްގައިމު ގޮނޑުދޮށެވެ. އިރު އޮއްސެމުން ދިޔަ ރަތްވިލާތަކުން އުޑުމަތި ވަނީ ކުލަތަކުން ފުރާލާފައެވެ. ގޮނޑުދޮށުގައި ހުރި ބޮޑު ކާނި ގަހެއްގެ ހިޔަލުގައި ޖޯއްޔެއްގައި ތިބި ތިން ރަޙްމަތްތެރިންނެވެ. ނަސީމް، އާލިމް އަދި ރީމާއެވެ. އެމީހުންގެ އުފާވެރި ހިނިގަނޑުގެ އަޑާއި ރާޅުޖަހާ މަޑު އަޑާ އެކުވެ މާޙައުލަށް އިތުރު ފިނިކަމެއް ގެނުވަމުން ދިޔައެވެ.
"އެންމެ ފަހުން އެ ކަކުނި އަހަރެންގެ ފައިގެ އިނގިލީގައި ހިފީމަ ދެއްކި މަންޒަރު ދެކުނު ނަމަ... އަހަރެން ހީކުރީ އެއީ ގަލެކޭ!" ނަސީމް އޭނާގެ މަޖާ ވާހަކައެއް ކިޔައިދެމުން ބުންޏެވެ. "އަހަރެން އެހާ ބާރަށް ދުއްވައިގަތީމަ ގޮނޑުދޮށުގައި ތިބި އެންމެން ހީކުރީ އަހަންނަށް ބޮޑު ބިރެއް ފެނުނީ ކަމަށް!"
ނަސީމްގެ ވާހަކަ ނިމުނުއިރު އާލިމް އާއި ރީމާގެ ހިނިގަނޑު ހުއްޓައެއް ނުލެވެއެވެ. ރީމާ ބަނޑުގައި އަތްއަޅައިގެން އިނދެފައި ހީލަ ހީލާ ބުންޏެވެ. "ނަސީމްއާ ހެދި ބައެއް ފަހަރު ބަނޑުގަ ރިއްސާ."
ނަސީމްއަކީ އަބަދުވެސް އެކަހަލަ ކުއްޖެކެވެ. ކޮންމެ ކަމަކުންވެސް މަޖަލެއް ނަގައި އެންމެންގެ މޫނުމައްޗަށް ހިނިތުންވުން ގެނުވާ ކުއްޖެކެވެ. އޭނާ ހުންނަ ކޮންމެ ތަނެއް ވެގެންދަނީ އުފާވެރިކަމާއި ސަކަރާތުން ފުރިގެންވާ ތަނަކަށެވެ.
އިރު އޮއްސި މަޑު އަނދިރިކަމެއް މާޙައުލަށް ވެރިވާން ފެށުމުން އެންމެންވެސް ހިމޭންވިއެވެ. ރާޅުތަކުގެ އަޑު ފިޔަވައި އިތުރު އަޑެއް ނީވެއެވެ. އެވަގުތު އާލިމަށް ނަސީމްގެ މޫނަށް ބަލާލެވުނެވެ. އަބަދުވެސް އެންމެން ހެއްވާ މަޖާ ނަސީމްގެ ލޮލުން އާލިމްއަށް ފެނުނީ އެހެން އަސަރެކެވެ. އެއީ އެންމެ ސިކުންތަކަށް ފާޅުވެފައި ގެއްލިގެން ދިޔަ ފުން ހިތާމައެއްގެ އަސަރެވެ. އުދަރެހަށް ބަލަހައްޓައިގެން އިންއިރު އޭނާގެ ހިނިތުންވުން ވަނީ ފިލާފައެވެ.
"ނަސީމް" އާލިމަށް މަޑުމަޑުން ގޮވާލެވުނެވެ.
އެ އަޑަށް ނަސީމް ސިހުނު ކަހަލައެވެ. އޭނާ ވަގުތުން އެނބުރި އާލިމްއަށް ބަލާލާފައި ކުރިންވެސް އޭނާގެ މޫނުމަތީގައިވި މަޖާ ހިނިތުންވުން އަނެއްކާވެސް ވެރިކޮށްލިއެވެ. "ކިހިނެއްވީ؟ ދާންވީނު ދޯ! މިހާރު މަންމަ ހުންނާނެ އަހަރެންގެ ވާހަކަ ދައްކަ ދައްކާ."
ނަސީމް ތެދުވެ ގައި ފޮޅާލިއެވެ. އެކަމަކު އާލިމްގެ ހިތުގައި ސުވާލުތަކެއް އުފެދިއްޖެއެވެ. ނަސީމްގެ އެ ފިލާފައިވާ ހިނިތުންވުމުގެ ފަހަތުގައި ވަނީ ކޮންކަހަލަ ސިއްރެއް ބާވައެވެ.
1ބައި 1 / 9